Saltkjöt og baunir - túkall!
Sprengidagurinn er í dag og af því tilefni viljum við deila með ykkur gómsætri uppskrift af saltkjöti og baunum sem Matarhorninu barst frá þingmanninum okkar Þorsteini Sæmundssyni.
Uppskrift:
1,5 - 2 kg Saltkjöt
150 gr. Beikon
500 gr. Rófur
250 gr. Gulrætur
1 stór laukur
2 pokar gular baunir
Leggið baunirnar í bleyti yfir nótt. Skolið baunirnar vel. Sjóðið við vægan hita í tvo og hálfan tíma. Tvöfalt meira af vatni en baunum. Horfið til með baununum og fleytið froðu ofan af. Hrærið í öðru hvoru og passið vel að baunirnar brenni ekki við. Sjóðið saltkjötið í sér potti (stundum sker ég kjötið af beinum en sýð beinin með) í tvo til þrjá tíma. Skerið grænmeti frekar smátt og bacon í litla bita. Þegar baunirnar hafa linast mauka ég þær með töfrasprota. Set bacon og grænmeti útí baunirnar. Set soð af saltkjötinu út í súpuna og smakka til þar til súpan er hæfilega sölt. Ber saltkjötið fram á sér diski.
Verði ykkur að góðu og njótið vel!