Hræsni og tvískinnungur borgarstjóra

 

Hræsni og tvískinnungur borgarstjóra

 

Ekki er sama Álfsnes og Gufunes í stjórnkerfi Reykjavíkurborgar. Þann 1. september sl. sendi Minjastofnun borgarstjóra bréf þess efnis að framkvæmdaleyfi til Björgunar í Álfsnesi yrði afturkallað vegna ólögmætrar málsmeðferðar með vísan í erindi frá stofnuninni til Reykjavíkur dags. 26. ágúst 2020. Því mótmælir umhverfis- og skipulagssviðs. Til rökstuðnings bendir Minjastofnun á að samkvæmt skipulagslögum skal sveitastjórn ekki gefa út framkvæmdaleyfi fyrr en að undangenginni vettvanskönnun á því hvort frekari rannsóknar á svæðinu er þörf, hvort gera skuli tillögu um friðlýsingu eða hvort fornleifar megi víkja og þá með hvaða skilmálum. Það er alveg skýrt í lögunum að óheimilt er að veita leyfi til framkvæmda fyrr en ákvörðun Minjastofnunar liggi fyrir. Reykjavíkurborg leitaði ekki umsagnar Minjastofnunar né gerði kröfu um að framkvæmdaraðili legði fram slíka umsögn áður en framkvæmdaleyfi var veitt. Er það sérlega ámælisvert því í umhverfismati fyrir svæðiið og umsögn Skipulagsstofnunar kom fram að sækja þyrfti um leyfi Minjastofnunar vegna framkvæmdanna. Þegar þessi grein er skrifuð eru komnar stórtækar vinnuvélar í fjöruborð Álfsness og mikið rask hefur verið framið þar. Fornleifar frá miðaldahöfn í Reykjavík er eiðilagðar viljandi. Hvað gengur borgarstjóra til. Með hinni hendinni var tæpum hálfum milljarði eytt í braggaskrípi í Nauthólsvík frá hernámsárunum á grunni minjasjónarmiða.

Ber nú svo við að Vegagerðin hefur óskað eftir fundi með Minjastofnun. Bréf þess efnis var lekið til kjarninn.is og það túlkað á þann hátt að ef af friðlýsingu minja í Álfsnesi yrði þá væri lagning Sundabrautar í uppnámi. Slíkt er fjarri sanni eins og margar skýrslur hafa sýnt. Þessi frasi er tugginn áfram með borgarlögmann í broddi fylkingar. En hver er hinn eini sanni skemmdarvargur Sundabrautar? Það er borgarstjóri sjálfur. Beinum nú sjónum okkar að Gufunesi. Þar eru komnar í gang stórkoslegar framkvæmdir í vegastæði Sundabrautar eins og sjá má á myndinni sem fylgir þessari grein. Smáhýsin fimm sem kominn er grunnur að eru byggð fyrir miðri Sundabraut og Þorpsblokkin er í útjaðri brautarinnar og langt inni á veghelgunarsvæðinu. Það er langur vegur frá því að Minjastofnun sé að eyðieggja lagningu Sundabrautar þegar borgarstjóri og meirihlutinn bera sökina. Borgarstjóri lítur á Reykjavík sem ríki í ríkinu sem ekki þarf að fara að lögum.

 Heimild:  https://borgarsogusafn.is/sites/borgarsogusafn.is/files/atoms/files/skyrsla_139.pdf

 

Höfundur:  Vigdís Hauksdóttir, borgarfulltrúi Miðflokksins

Greinin birtist í Grafarvogs-, Grafarholts- og Árbæjarblaðinu þann 16. september, 2020