Hroki og hleypidómar
Pistill
Miðvikudagur, 14. ágúst 2019
Nú þegar hillir undir lokaátök um 3ja Orkupakkann grípa meðmælendur hans til þekktra vopna í baráttu sinni fyrir erlenda hagsmuni. Nú sem fyrr er klifað á því sem gert var eða ekki gert fyrir 6 árum eins og það skipti sköpum um ákvarðanir dagsins í dag. Enn sem fyrr er hræðsluáróðurinn dreginn fram um að EES samningurinn sé fyrir bí verði OP 3 hafnað. Hvort tveggja er alrangt. Forystumenn Sjálfstæðisflokksins eru í keppni um hver þeirra getur niðurlægt grasrót sína mest. Sjálfstæðismenn eru boðaðir til fundar til þess eins að formaður flokksins geti sagt þeim að þeim komi þetta mál ekkert við og að undirskriftir þeirra, þúsundir, skipti ekki máli. Þingflokkurinn sé með málið. Bætt er um betur og sagt að þingflokkurinn geti ekki sveiflast eftir óánægjuröddum í flokknum enda er „alltaf þægilegast að vera svoleiðis stjórnmálamaður að hlusta bara á sjálfan sig og taka tillit til eigin samvisku í þessu málum“. (SÁA) Engum sögum fer af því í hvers umboði þingflokkur Sjálfstæðisflokksins situr. Það mun samt á endanum koma í ljós. Ritari flokksins lætur ekki sitt eftir liggja og afneitar öllum varnaðarorðum sem fram hafa komið af höndum færustu lögspekinga um áður óþekkt valdaafsal, um að stjórnarskráin sé þanin til hins ýtrasta og að s.k. lagalegir fyrirvarar séu ekki pappírsins virði. Enda „er það fyrst nú upp á síðkastið sem andstaða við það hefur sprottið upp og stórar fullyrðingar settar fram um meintar skelfilegar afleiðingar þess.“ (ÁAS) Utanríkisráðherrann og „wannabe“ formaður Sjálfstæðisflokksins hefur þó kannski komið sterkastur inn með stærstu fréttirnar. Hér á Íslandi eiga að hafa verið flokkar norskra flugumanna (m.a. úr norska Miðflokknum) til að stunda hér undirróður. „Við Íslendingar eigum sjálfir að ráða okkar málum“ segir utanríkisráðherrann „og þess vegna skulum við samþykkja OP3 frá Brüssel.“ RUV kraninn lekur þessu gagnrýnislaust en með athyglisverðum myndskreytingum. Norskir stjórnmálamenn og samtök hafa rekið mál vegna hluta innleiðingar OP3 í Noregi. Það verður tekið fyrir eftir nokkrar vikur fyrir stjórnlagadómstóli í Noregi en hví getum við ekki beðið niðurstöðu hans áður en við undirgöngumst OP3? Hví getum við ekki staldrað við og gaumgæft þau málaferli vegna meintrar rangrar innleiðingar sem í gangi eru? Við gætum örugglega margt lært af þeirri lesningu en í staðinn gengur ríkisstjórnin ákveðin í spori að bjargbrúninni og mun ekki láta þar staðar numið. Lokaspurningunum er þó enn ósvarað! Hví liggur svo á að innleiða OP3? Hverra hagsmunir kalla á innleiðingu pakkans?
Höfundur er þingmaður Miðflokksins í Reykjavíkurkjördæmi suður. thorsteinns@althingi.is
Höfundur: Þorsteinn Sæmundsson