Fækkun íbúa í hverju sveitarfélagi er grafalvarlegt mál. Tekjur sveitarfélaga byggjast að mestu á útsvarsgreiðslum og þegar fækkar í þeim hópi getur það haft alvarlegar afleiðingar fyrir uppgang og samkeppnisstöðu sveitarfélaga. Í Hafnarfirði fækkaði íbúum um 305 einstaklinga á síðastliðnu ári, eða um 1 prósent. Hafnarfjörður er eina sveitarfélagið á höfuðborgarsvæðinu þar sem fækkaði, utan reyndar Seltjarnarness þar sem fækkaði um níu einstaklinga. Í öllum hinum sveitarfélögunum fjölgaði íbúum. Mest varð fjölgunin í Garðabæ, 4,5 prósent, í Mosfellsbæ 4,3 prósent, í Kópavogi 1,6 prósent og Reykjavík 1,5 prósent.
Það hefur vafalítið haft mikil áhrif á byggðaþróun í Hafnarfirði þegar upp kom bakslag í flutningi á raflínum Landsnets sem lágu að hluta yfir framtíðarbyggingarlandi bæjarins, í sunnanverðri Skarðshlíð og Hamranesi sunnan við Vallahverfið í Hafnarfirði. Snemma við upphaf kjörtímabilsins benti Miðflokkurinn á að grípa ætti til plans B, og breyta deiliskipulagi í hverfi sem kallað er Hellnahraun 3 (þriðji áfangi) og gera það að íbúðahverfi en hverfið hafði verið skipulagt sem iðnaðarhverfi.
Ekki hafði einni einustu lóð verið úthlutað í því hverfi og allar breytingar því handhægar enda hverfið utan þynningarsvæðis álversins. Auk þess nýtur hverfið þeirra forréttinda að þegar horft er í sólarátt til suðurs eru engar línur að þvælast fyrir útsýni að Sveifluhálsi og Reykjanesfjallgarðinum sem þar blasir við til suðurs. Þessa breytingu hefði verið hægt að gera strax 2018 en tillagan hlaut ekki hljómgrunn meirihlutans. Því tók við að segja má lóðaskortur fyrir fjölbýli sem staðið hefur yfir í tvö ár og afleiðingarnar eru fækkun bæjarbúa. Skemmst er frá því að segja að nú hefur raflínan verið færð tímabundið frá Hamraneshverfinu og syðsta hluta Skarðshlíðarhverfis og því bjartari horfur fram undan í uppbyggingu fjölbýlishúsa sem og annarra eigna. Vonandi næst að snúa við þessari óheillaþróun sem verið hefur í íbúafjölgun í bænum.
Höfundur: Sigurður Þ. Ragnarsson, bæjarfulltrúi Miðflokksins í Hafnarfirði
Greinin birtist í Fréttablaðinu þann 29. janúar, 2021