Þann 17. júní síðastliðinn birtist pistill eftir undirritaðan sem hófst á orðunum:
Lánleysi ríkisstjórnarinnar í orkumálum virðast engin takmörk sett. Landið er í bráðri þörf fyrir meiri raforku á öllum sviðum.
Þá höfðu áform um Hvammsvirkjun steytt á skeri.
En hver er staðan nú, réttu hálfu ári síðar?
Í þinginu er verið að setja neyðarlög, til að tryggja að ljós kvikni í stofum landsmanna og vatnið hitni í pottunum á nýju ári.
Áform um téð neyðarlög, sem mætti kalla lög um rafmagns-skömmtunarstjóra ríkisins, mæta nú miklum efasemdum í meðförum þingsins. Ástæður efasemdanna eru ýmsar en það blasir við að orkuskortur eins og sá sem við stöndum nú frammi fyrir, með gríðarlegu tjóni fyrir þjóðarbúið, var fyrirséður.
Í ljósi harkalegra viðbragða umsagnaraðila, og er þá á engan hallað þó að sérstaklega sé bent á umsögn Samtaka iðnaðarins, virðast stjórnarflokkarnir ætla að kaupa sér frið frá málinu með því að gera tvær breytingar.
Annars vegar að stytta líftíma laganna í 12 mánuði úr 24 og hins vegar að hafa þann hátt á að umhverfisráðherra sjálfur verði í hlutverki skömmtunarstjóra ríkisins en ekki fulltrúi hans orkumálastjórinn.
En hverju skipta þessar breytingar í raun? Lögin verða auðvitað bara framlengd að 12 mánuðum liðnum, enda engin breyting fyrirséð innan þess tíma og svo aftur og aftur. Hvað skömmtunarstjórann varðar, þá er það bitamunur en ekki fjár hvort undirmaður ráðherrans tekur ákvörðunina eða ráðherrann sjálfur að fenginni ráðgjöf undirmannsins.
Verst er þó, fyrir hagsmuni lands og þjóðar, að með núverandi ríkisstjórn er sennilega pólitískur ómöguleiki í því fólginn að færa þessi mál til betri vegar.
En nú vill svo til að þingflokkar Miðflokksins og Viðreisnar hafa boðið fram stuðning sinn við þær orkuöflunaraðgerðir sem til gagns geta orðið og vit er í, en það gerðist með yfirlýsingu í þinginu á mánudaginn. Staðan er því sú að rúmur þingmeirihluti er fylgjandi aukinni orkuframleiðslu, staðan er að minnsta kosti 37-26 með aukinni orkuöflun, sennilega er stuðningurinn enn meiri.
Þingflokkar Sjálfstæðisflokks og Framsóknarflokks eru því í þeirri snúnu stöðu að þingmeirihluti er tryggður, vilji þeir þiggja stuðninginn, til að keyra í gegn aðgerðir sem geta bætt stöðu orkumála. Vandinn er sá að eins og í hvalveiðimálinu forðum eru orð ódýr, flokkarnir vilja áfram halda í hönd VG, sem virðist hafa neitunarvald í öllum málum er varða aukna verðmætasköpun í samfélaginu.
Þegar öllu er á botninn hvolft eru það því þingflokkar Sjálfstæðisflokks og Framsóknarflokks sem sitja uppi með skömmina á meðan staðan breytist ekki, vinstri grænir eru jú bara að fylgja pólitískri stefnu sinni og eru að ná árangri.
Höfundur er þingflokksformaður Miðflokksins. bergthorola@althingi.is