Mat mitt var því miður að í haust yrði staðan óbreytt. Samgöngusáttmálinn yrði uppfærður, en ekki endurskoðaður, eins og innviðaráðherra orðaði það. Fjáraustur úr opinberum sjóðum héldi áfram sem stjórnlaus væri og viðbótargjaldtaka (tafagjöld) ofan á hina gríðarmiklu gjaldtöku sem umferð er nú þegar undirorpin (og búið er að tilkynna) yrði aukin enn meira en áætlað var.
En þá glitti í örlítið ljós, fjármálaráðherrann Bjarni Benediktsson birti góða grein hér í Morgunblaðinu hinn 7. september sl. þar sem veruleikinn í kostnaðarþróun borgarlínu var teiknaður upp. Sagði hann 140 viðbótarmilljarða þegar lenta í fangi ríkissjóðs vegna sáttmálans. Og þá er reksturinn eftir.
Framkvæmdastjóri Betri samgangna ohf. Davíð Þorláksson var ekki lengi að segja þetta engin tíðindi. Það var og, enda virðist hann aldrei kippa sér upp við tugmilljarða kostnaðarauka fyrir skattgreiðendur í þessu verkefni sem hann stýrir.
Eini gallinn við grein fjármálaráðherra er að hann heldur áfram að tala í útfærslum markaðsmannanna um kostnaðarskiptingu borgarlínunnar. Hann segir þannig borgarlínuhluta samgöngusáttmálans hafa farið úr 67 milljörðum (uppfært m.v. vísitölu Vegagerðarinnar) í 126 milljarða, en ofan á þá tölu ber auðvitað að bæta svokölluðum Sæbrautarstokki og Miklubrautarstokki. Þá er talan komin í um 200 milljarða og enn töluverð óvissa eftir.
Líklegast er að mat fjármálaráðherra á kostnaðinum við borgarlínuna, upp á um 200 milljarða, klóri sig hratt og örugglega upp í 250 milljarðana sem ég spáði, í síðasta lagi við verkhönnun og útboð.
Fjármálaráðherra bendir svo á að kostnaður vegna nýframkominnar kröfu sveitarfélaga á höfuðborgarsvæðinu um aðkomu ríkissjóðs að rekstri borgarlínu/Strætó bs. sé núvirtur um 40 milljarðar, eða 3,6 til 4,9 milljarðar á ári. Forsenda fyrir samþykkt laga um Betri samgöngur ohf. var að ríkissjóður kæmi ekki að rekstri borgarlínu.
En nú verður fjármálaráðherra að spyrna við fótum fyrir hönd okkar skattgreiðenda. Á meðan útgjaldaþrýstingurinn hjá ríkissjóði er eins og hann er, þá er óforsvaranlegt að borgarlínuhluti sáttmálans haldi áfram eins og ekkert hafi í skorist.
Það eru flestir fylgjandi góðum almenningssamgöngum, en leiðin að því marki má ekki vera vörðuð óraunhæfum og úreltum lausnum.
Það kemur í ljós í haust hvort fjármálaráðherra fer raunhæfu leiðina í þágu skattgreiðenda í landinu og slái þessa vitleysu út af borðinu í núverandi mynd eða bjargi borgarlínunni fyrir horn.
Höfundur er þingflokksformaður Miðflokksins. bergthorola@althingi.is